"apne bistar pe bohat dair se mein neem daraaz
soch rahi hoon ke woh iss waqat kahan ho ga?
mein yahan hoon magar uss koocha_e_rango_boo  mein
roz ki tarha se aaj bhi woh aaya ho ga
aur jub uss ne mujh ko wahan na paaya ho ga-!?

aap ko ilam hai aaj woh kiyun nahi aayi
meri har dost se uss ne poocha ho ga
kiyn nahi aayi woh-kiya baat hui aakhir
khudd se iss baat par so baar woh uljha ho ga
kal woh aaye gi to mein uss se nahi boloon ga
aap hi aap kayi baar woh rootha ho ga
woh nahi hai to bulandi ka safar kitna kathin ha 
seeriyaan charte hue uss ne socha ho ga
raah dari mein hare loan mein phooloon ke kareeb
uss ne har simat mujhy dhoonda ho ga

naam bhoolay se mera kahin aaya ho ga
gair mehsoos tareeqe se woh chonka ho ga
aik jumlay ko kayi baar sunaaya ho ga
baat karte huye so baar woh bhoola ho ga
yeh jo nayi larki aayi hai'kahin woh to nahi
uss ne har chehra yahi soch ke dekha ho ga
jaan_e_mahfil hai'magar aaj'faqat mere baghair
hi kiss darja wahi bazam mein tanha ho ga
kabhi sannatoon se jo wahshat huyi ho gi usse
uss ne baysahta phir mujh ko pukara ho ga

chalte chalte koi maanoos si aahat pa kar
dostoon ko bhi kissi uzar se roka ho ga
yaad kar ke mujhe'num ho gayi hoon gi palkein
"aankh mein parr geya kuch"keh ke taala ho ga
aur ghabra kar kitaaboon mein jo li hogi panah

har sitar mein mera chehra ubhar aayaa ho ga
jub milli ho gi usse meri halatki khabar
uss ne aahista se diwar ko thama ho ga
soch kar yeh ke behal jaye pareshaniye dill
yunhi bay wajha kissi shaks ko roka ho ga

itfaqan uss sham mujhe meri dost milli
mein ne poocha k suno-aaye thay woh-kaise thay?
mujh ko poocha tha-?mujhe doondha tha charoon janib-?
uss ne aik lamhe ko dekha mujhe aur phir hans di
uss hansi mein to woh talkhi thi ke iss se agay
keya kaha uss ne'mujhe yaad nahi hai'lakin
itna maaloom hai ke khawaboon ka bharam toot geya.